भक्तपुरको नलिनचोकमा हाइस र बस ठोक्किँदा १०/१२ जना घाइते, अस्पतालमा उपचार हुँदै

भक्तपुर, २८ जेठ ।

भक्तपुरको सूर्यविनायक नगरपालिका–१० नलिनचोकमा बिहीबार अपराह्न दुई वटा यात्रुवाहक सवारी साधन एक आपसमा ठोक्किँदा १०/१२ जना यात्रु घाइते भएका छन् ।

धरानबाट काठमाडौँतर्फ जाँदै गरेको बा.३ ख ७७५३ नम्बरको हाइस र काठमाडौँबाट बनेपा-धुलिखेलतर्फ गुडिरहेको बा.५ ख ४७८१ नम्बरको मयुर यातायातको बस अपराह्न १६:३५ बजेको समयमा एक आपसमा ठोक्किएर दुर्घटना भएको हो ।

दुर्घटना लगत्तै स्थानीय र प्रहरीको टोलीले घाइतेहरूको उद्धार गरेका थिए । घाइतेहरूलाई उपचारका लागि मध्यपुर अस्पताल र सूर्यविनायक नगर अस्पताल पठाइएको छ । घाइतेहरूको अवस्था र परिचय खुल्न बाँकी रहेको तथा घटनाबारे थप अनुसन्धान भइरहेको प्रहरीले जनाएको छ ।